في أول أيام إهتمامي بمشروع التبرع بالدم إتبرعت لبنت رقيقة وجميلة بنت إسمها منى عمرها 18 سنة كانت المفروض تعمل عملية زرع نخاع اتبرعت أنا وإثنين من أصحابي بعد التبرع فكرنا نزورها ونسلم عليها بالرغم من اننا مش نعرفها زورنا منى وبقينا أصحاب وضحكنا معاها وضحكت كمان منى وبعد تبرعنا بكام يوم إكتشفت إن منى ماتت أول حاجة فكرت فيها ان إحنا فشلنا في مساعدتها ولكن لما فكرت لقيت ان ده أجلها وان منى كسبت ضحكتها في الدنيا وإحساسها ان في ناس مش عارفنها بس مهتمين بيها وإتبرعوا ليها عشان يسعدوها وكمان حسيت إن دمي أنا وأصحابي سبقني عند ربي واللي بفكر فيه دلوقتي ياترى إحنا وفينا؟ ويترى منى بتقول لربنا ايه علينا؟ ربنا يرحمك ياأحلى وردة نورت حياتنا اللهم اني أسألك الإخلاص في القول والفعل والعمل

اولا السلام عليكم موضوعى مع التبرع ابتدى بضحكة يوم ماشى فى الشارع و كان فيه حملة تبرع ضحكت و قلت ادخل اجرب ايه اللى حخسره وكانوا ساعتها بيقدموا تشيرتات عليها لوجو التبرع فقلت ليه كل ده علشان شوية دم بعد كده عرفت يعنى ايه معنى شيك دم مهم غى حياتنا فى حياة اخ لينا او اخت محتاجينه تجربتى مع ناس كتير منهم زميلتى فى الكلية قدر الله انه يكون عندها مرض فى الرئة و حصل نزيف و كانت محتاجة دم كتير بلازما و كرات عرفت معنى ان تروح لبنك الدم و يقولك اسفين الفصيلة نادرة و مش متوفرة فهمت قيمة ان يوم مااتبرعت كان فيه واحد مستنى الكيس ده بفارغ الصبر و ان ممكن يكون ده امله فى الحياة ان يبقى فيه كيس متوفر و ياخده للمريض بس للاسف الواحد مايعرفش قيمة الحاجة الا لما يكون فى الموقف و يحصل قدامه ياريت اى واحد مايسيبش الفرصه ديه ممكن يوم يكون اخر فرصه لشفاء حالة محتاجة تبرع " الاعمار بيد الله " بس احنا بناخد بالاسباب الله يرحم امواتنا اموات المسلمين